Ginagawa ng Philippine National Police (PNP) ang lahat ng posibleng paraan upang matiyak na mapayapang matatapos ang kilos-protesta sa kahabaan ng EDSA nang walang kaguluhan at walang masasaktan.
Ayon kay PNP Public Information Office Chief PCol. Allan Rae Co, patuloy na sinusuri ng PNP ang lahat ng posibleng hakbang habang nakahanda rin ang mga contingency plan upang mapanatili ang kaayusan sa mga lansangan sa legal na paraan kung kinakailangan.
Kasalukuyan namang nakikipagnegosasyon si NCRPO Director PMGen. Anthony Aberin sa mga organizer ng rally upang magkaroon ng mapayapang pagtatapos ng pagtitiponat maibalik sa normal ang sitwasyon sa lalong madaling panahon.
Aniya, hangga't may pagkakataong matapos ang kilos-protesta nang mapayapa at walang masasaktan, iyon ang pangunahing layunin ng PNP.
Hanggang alas-2:00 ng hapon, mahigit 12,000 katao na ang namonitor ng PNP sa White Plains Avenue, bukod pa sa mga nagtitipon sa EDSA Shrine.
Samantala, nasa 6,500 pulis ang nakakalat sa iba't-ibang bahagi ng Metro Manila upang tiyakin ang kaayusan at seguridad sa gitna ng kilos-protesta.
