Inihahanda na ng Philippine National Police (PNP) ang kasong administratibo at kriminal laban sa isang pulis na nakatalaga sa Camp Crame matapos itong maaresto sa Pagadian City, Zamboanga del Sur dahil sa umano'y pagdadala ng mahigit P1 milyong pisong halaga ng hinihinalang smuggled cigarettes
Ayon kay PNP Chief Police General Jose Melencio Nartatez Jr., agad niyang ipinag-utos ang paglalagay sa pulis sa restrictive custody at ang pagsasampa ng kaukulang kaso sa sandaling mtapos ng Bureau of Customs ang imbestigasyon.
Naaresto ang pulis sa isinagawang checkpoint operation ng mga intelligence personnel ng Pagadian City Police Station sa kahabaan ng National Highway sa Barangay Tiguma, matapos makatanggap ng impormasyon ang mga awtoridad hinggil sa umano’y pagbibiyahe ng smuggled na sigarilyo.
Tinangka ng suspek na makalusot sa checkpoint, ngunit sa isinagawang inspeksyon sa sasakyan ay natuklasan ng mga pulis ang 251 reams ng umano'y smuggled cigarettes na tinatayang nagkakhaalaga ng ₱1.285 milyon.
Muling idiin ni Nartatez na walang puwang sa PNP ang sinumang sangkot sa iligal na aktibidad, anuman ang ranggo o assignment nito.
