Muling iginiit ng Philippine National Police (PNP) ang mahigpit na pagpapatupad ng mga patakaran sa pagmamay-ari, pagrerehistro at paglilisensya ng mga baril sa gitna ng public attention sa mga usapin ng firearm disclosures na kinasasangkutan ng ilang public officials.
Ayon kay PNP Chief Police General Jose Melencio Nartatez Jr., ang paalala ay para sa lahat ng gun owners bilang bahagi ng mandato ng PNP na tiyaking maayos na narehistro at lisensyado ang lahat ng armas sa bansa.
Aniya, ang pagmamay-ari ng baril ay isang pribilehiyo sa ilalim ng batas at kinakailangang may lisensya, rehistro at regular renewal sa Firearms and Explosives Office ng PNP.
Dagdag pa niya, mahalaga rin ang pagsunod sa mga alituntunin sa ligtas na pag-iingat, tamang dokumentasyon at legal na paghawak ng mga armas upang matiyak ang pananagutan at kaligtasan ng publiko.
Iginiit din ng PNP Chief na walang sinuman ang exempted sa pagpapatupad ng batas dahil lahat ng gun owners, anuman ang kanilang katayuan o posisyon sa gobyerno, ay saklaw ng parehong mga regulasyon sa pagmamay-ari ng baril.
