Naghahanda ang Philippine National Police sa seguridad para sa nakatakdang impeachment trial sa Senado.
Ayon kay PNP Chief Gen. Jose Melencio Nartatez Jr., tinatapos na ang mga security preparations katuwang ang NCRPO at iba pang units upang matiyak ang sapat na puwersa at maayos na peace and order sa paligid ng Senado.
Giit ni Nartatez, posibleng maging"emotionally-charged" ang sitwasyon kaya layunin ng PNP na maiwasan ang anumang banta sa seguridad at kapayapaan.
May ilang pulis na naka-deploy na sa paligid ng Senado mula pa noong May 11.
Tiniyak din ni Nartatez ang patuloy na koordinasyon sa Office of the Senate Sergeant-at-Arms para sa mas maayos na pagpapatupad ng seguridad sa loob at labas ng Senado.
Mananatiling off-limits ang mga pulis sa loob ng Senado maliban na lamang kung may mga emergency o hindi inaasahang insidente.
Nakikipag-ugnayan din ang PNP sa House Sergeant-at-Arms para sa posibleng security augmentation sa mga miyembro nito na magsisilbing prosecutors sa impeachment proceedings.
Paliwanag ng PNP Chief, batid nila ang mga nauna nang karanasan sa ganitong mga sitwasyon kaya patuloy nilang pinapahusay ang kanilang mga security protocols upang matiyak ang kaligtasan ng lahat ng partido.
