Nanindigan ang Philippine National Police (PNP) na hindi na maaaring magsilbing detention facility para sa mga high-profile personalities ang custodial facility nito sa Camp Crame sa Quezon City.
Ayon kay PNP Chief PGen. Jose Melencio Nartatez Jr., inatasan na niya ang Legal Service ng PNP na ipaliwanag sa Sandiganbayan kung bakit hindi na angkop ang pasilidad para sa mga high-profile detainee tulad ni Sen. Jinggoy Estrada.
Nauna nang hiniling ng kampo ng senador sa Sandiganbayan Fifth Division ang kanyang paglipat sa Camp Crame.
Gayunman, sinabi ng PNP na nakatakda nang ipa-renovate ang Custodial Center upang bigyang-daan ang pagtatayo ng mga bagong opisina, alinsunod sa naunang pahayag ni DILG Secretary Jonvic Remulla.
Ayon pa kay Nartatez, nangangailangan ng mas maraming tauhan at resources ang pagbabantay sa mga high-profile detainee.
Aniya, may iba pang ligtas na pasilidad na mas komportable para sa mga detainee kumpara sa Custodial Center na may ilang limitasyon.
Iginiit ng PNP na igagalang nito ang anumang magiging desisyon ng Sandiganbayan kaugnay sa kahilingan ni Estrada.
