Inilagay na sa heightened alert ang lahat ng tauhan ng Philippine National Police (PNP) sa buong Mindanao kasunod ng malakas na lindol na tumama sa offshore area ng Sarangani nitong umaga.
Sa isang pahayag, sinabi ni PNP Chief PGen. Jose Melencio Nartatez Jr., nakahanda ang mga pulis na tumulong sa mga evacuation efforts, pag-secure ng mga kritikal na imprastraktura at pagsuporta sa mga relief operations sa mga apektadong lugar.
Tinitiyak din ng PNP na bukas ang mga pangunahing kalsada para sa mga rescue team at maayos ang mga evacuation centers, lalo na sa mga komunidad na nasa ilalim ng tsunami warning.
Nakikipag-ugnayan na rin ang pambansang pulisya sa Office of Civil Defense, NDRRMC at mga lokal na pamahalaan na apektado.
Ayon kay Nartatez, nananatiling pangunahing prayoridad ng PNP ang kaligtasan at seguridad ng mga residenteng apektado ng lindol.
#
