Inatasan ng liderato ng Philippine National Police (PNP) ang Anti-Cybercrime Group (ACG) na palakasin ang monitoring sa mga online gaming platforms dahil sa banta ng child exploitation.
Ayon kay PNP Chief Gen. Jose Melencio Nartatez Jr., target nilang bantayan ang mga platform na may maraming menor de edad na posibleng ginagamit sa grooming at iba pang krimen.
Ang hakbang ay kasunod ng babala sa sikat na online gaming platform na Roblox dahil umano sa paggamit nito sa pagsasamantala sa mga bata.
Nakikipag-ugnayan na ang pulisya sa DICT at CICC upang imbestigahan ang mga ulat ng ng iligal na aktibidad sa naturang online games.
Ayon sa ulat, binigyan ng CICC ang Roblox ng hanggang sa katapusan ng buwan para ipaliwanag sa mga awtoridad ng bansa ang mga hakbang na ipinatutupad nito upang maging ligtas ang platform para sa mga bata, bilang bahagi ng mas malawak na pagsisikap ng pamahalaan na tiyakin ang kaligtasan ng online space para sa mga kabataang gumagamit.
