Naglabas na ng pahayag ang komedyanteng si Pokwang kaugnay ng nag-viral na video na kinasangkutan ng isang lalaki na kinilalang si Carlo Tano Subong, na sinasabing kapatid niya.
Ang insidente ay may kaugnayan sa umano’y alitan ng nasabing lalaki at isang ama na kasama ang kanyang menor de edad na anak.
Sa isang video na ibinahagi ni Pokwang sa kanyang Instagram account, kinumpirma niya na kapatid niya ang lalaking sangkot sa insidente.
Agad namang humingi ng tawad at paumanhin si Pokwang sa pamilyang nakaalitan ng kanyang kapatid, lalo na sa batang babae na makikita sa viral na video.
Aniya, ang pagkakamali ng kanyang kapatid ay hindi dapat iugnay sa kanya o sa kanilang buong pamilya.
Pinaalalahanan ng aktres ang publiko hinggil sa umiiral na batas laban sa cyberbullying at cyberlibel, at hinikayat ang mga netizen na maging maingat sa pagbibigay ng komento at pagpapakalat ng mapanirang impormasyon.
Kung maalala, naglabas na ng show cause order ang Land Transportation Office (LTO) laban sa nasabing driver at sinuspende ang kaniyang lisensya ng 90 araw habang nagpapatuloy ang imbestigasyon.
