Patuloy na nagsasagawa ng paghahanda ang Philippine National Police (PNP) sa pamamagitan ng simulation exercises para sa iba’t-ibang posibleng scenaryo sa gitna ng patuloy na pagtaas ng presyo ng produktong petrolyo.
Ayon kay PNP Public Information Office Chief Brig. Gen. Randulf Tuaño, ipinag-utos ni PNP Chief Gen. Jose Melencio Nartatez Jr. sa mga Police Regional Offices na paghandaan hindi lamang ang Summer Vacation kundi pati ang posibleng epekto ng pandaigdigang sitwasyon, kabilang ang tensyon sa Middle East
Nauna nang sinabi ni Tuaño na posibleng tumaas ang insidente ng theft at robbery lalo na’t umaabot na sa 403 ang mga gasolinahang nagsara na maaaring magdulot ng pagkawala ng trabaho.
Dahil dito, inatasan ang mga regional offices na magsagawa ng simulation exercises sa mga sitwasyong tulad ng massive looting at serye ng nakawan, kasabay ng pagpapalakas ng intelligence-driven operations laban sa mga grupong sangkot sa krimen.
Nilinaw naman ng PNP na bahagi ito ng kanilang proactive approach at hindi upang magdulot ng alarma, kundi para tiyakin ang kapayapaan at kaayusan sa gitna ng umiiral na global crisis.
