NAGA CITY-Masigla ang negosyong baboy sa Naga City People’s Mall pero nitong mga nagdaang mga linggo, may mga mamimili na tumatalikod na lamang matapos malaman ang presyuhan, rason naman ng mga negosyante kakaunti ang supply ng baboy at kakumpitensya ang mga biyahero.
Sa tala ng Naga City Price Coordinating Council, umaabot sa P380/kilo ng low retail sa laman gayundin sa high retail. Ang liempo naman P390/kilo ng low retail habang P400.00 sa high retail. P260.00 haggang P320.00 naman ang kilo sa ibang parte ng karne.
Una nang sinabi sa Brigada News FM Naga ni Market Supervisor Nepthali Pabines na base sa kanilang pakikipag-usap sa mga negosyante, idinadaing ng mga ito ang kakumpitensyang mga biyahero o ang mga mula sa ibang parte ng Luzon na kumukuha ng buhay na baboy sa lalawigan. Maliban pa rito may mga nahuli ring magpalaki dahil sa mga nagdaang kalamidad.
Sinabi naman ni Love Guarin, tagapagsalita ng Department of Agriculture Bicol marahil nga mahal ang kuha ng mga biyahero. Hindi na aniya sakop ng DA ang kontrol sa mga ito pero may papel aniya ang mga LGU.
Hinihintay ng DA ang update ng central office hinggil sa usapin ng pagpapatupad ng maximum suggested retail price. Pero sa kabilang banda aniya daan din ito upang makabawi ang mga hog raisers.
