Sumailalim ang primetime teleserye na “Sigabo” ni Coco Martin sa compliance seminar matapos makatanggap ng mga reklamo ang Movie and Television Review and Classification Board (MTRCB) hinggil sa diumano'y paulit-ulit at labis na pagpapakita ng karahasan sa programa.
Ginanap ang compliance seminar para sa CCM Film Productions, ang produksyong itinatag ng aktor, sa tanggapan ng MTRCB kahapon, July 6.
Ayon sa mga ulat, labis ang pagpapakita ng programa ng dahas, suntukan, pananakit, torture, at mararahas na pananalita.
Sa kanyang pahayag, nilinaw ni MTRCB Chair Lala Sotto na ang pagsasagawa ng naturang seminar ay naglalayong matulungan ang palabas at ang production nito.
Aniya, sigurado silang magiging socially relevant ang mga scenes at storyline ng "Sigabo," bagay na lubos nilang sinusuportahan.
Sa kabila nito, lagi raw may limitasyon ang lahat ng bagay.
Samantala, sinabi naman ni Malu Sevilla ng CCM Film Productions na naiintindihan nila ang nais mangyari ng MTRCB.
Tiniyak din nitong magiging responsable sila sa pagsunod sa pamantayan at alituntunin ng ahensya sa ipapalabas na mga programa.
