Muling nananawagan ang mga Pilipino sa social media na pangalagaan at iligtas ang Sierra Madre na patuloy na nagsisilbing natural na panangga ng Luzon laban sa malalakas na bagyo tulad ng Super Typhoon Uwan.
Itinuturing ng Climate Change Commission ng Pilipinas ang Sierra Madre bilang “natural fortress” ng Luzon at first line of defense laban sa mga kalamidad dulot ng klima.
Bukod sa paghadlang sa lakas ng hangin bago makarating sa kabundukan, ang Sierra Madre ay mahalaga rin bilang carbon sink, na tumutulong sa pagpapanatili ng balanse ng klima at ekolohiya, at sa pangangalaga ng 3,500 plant species, kung saan 58% ay endemic.
Ngunit, nagiging mahina na ang papel nito dahil sa deforestation at iligal na pagmimina.
Bilang pag-alala at pagpapahalaga, idineklara ng Presidential Proclamation 413 ang Setyembre 26 bilang Save Sierra Madre Day, na paalala sa kahalagahan ng pangangalaga sa mga kabundukan bilang natural na depensa ng bansa.
Kasama rin sa panawagan ang Cordillera Range na may habang 320 kilometro at sumasakop sa lahat ng lalawigan sa Cordillera Administrative Region at ilang bahagi ng Hilagang Luzon, at ang Caraballo Mountains na may 54 kilometro, na nasa pagitan ng Cordillera at Sierra Madre.
