Ipinag-utos ng liderato ng Philippine National Police ang agarang pagsisimula ng legal proceedings laban sa isang police corporal na nakunan sa video na umano’y nagtutok ng baril sa isang sibilyan sa Lungsod ng Dapitan, Zamboanga del Norte.
Mariing kinundena ni PNP Chief Gen. Jose Nartatez Jr. ang naging asal ng naturang pulis, na nakatalaga sa Sapang Dalaga Municipal Police Station sa Misamis Occidental.
Ayon sa ulat, naganap ang insidente bandang alas-8:30 ng gabi noong June 21 sa isang tindahan sa Barangay Antipolo, Lungsod ng Dapitan. Makikita sa CCTV footage na kalaunan ay kumalat sa social media ang umano’y pagtutok ng baril ng police corporal sa isang sibilyan habang sila ay nagtatalo.
Kasunod ng insidente, inalis sa kanyang puwesto ang naturang police corporal ng Misamis Occidental Police Provincial Office.
Isinailalim siya sa restrictive custody sa Police Provincial Office habang isinasagawa ang imbestigasyon.
Isinumite na rin ang reklamong kriminal laban sa kanya sa Dapitan City Prosecutor’s Office.
Lumabas din na ang naturang pulis ay nahaharap na sa iba pang kasong administratibo at kriminal, kabilang ang mga kasong may kaugnayan sa umano’y paglabag sa Republic Act No. 9262 o ang Anti-Violence Against Women and Their Children Act. May nakabinbin din siyang kasong kriminal sa Family Court sa Dapitan City.
