LUCENA CITY - Isinusulong na ng Quezon Metropolitan Water District (QMWD) ang terminasyon sa kasunduan nito sa PrimeWater Infrastructure Inc. (PWIC) matapos umanong mapatunayang lumabag umano ang kompanya sa mga itinakdang probisyon ng Joint Venture Agreement na nilagdaan noong Hunyo 8, 2018.
Ayon sa resolusyon ng QMWD, hindi umano natugunan ng Primewater ang mga obligasyong nakasaad sa kasunduan, na nagresulta sa pagkakadismaya ng mga concessionaires sa kanilang serbisyo.
Sa kabila ng unang bahagi ng pagpapatupad ng kasunduan, bigo ang Primewater na maresolba ang lumalalang suliranin sa suplay ng tubig, dahilan upang umalma ang mga LGU sa hurisdiksyon ng QMWD para sa proteksyon ng kanilang mga nasasakupan.
Dahil dito, pinagtibay sa pamamagitan ng Resolution No. 24-03 ang pormal na pagwawakas ng naturang kasunduan.
Layunin nitong tiyakin ang mas maayos at maaasahang suplay ng tubig para sa mga mamamayan ng Lucena City at iba pang apektadong lugar.
