Isinusulong ni Akbayan Party-list Representative Perci Cendana ang panukalang batas na layong kilalanin ang “lived identities” o nakasanayang pangalan ng transgender, intersex at non-binary Filipinos.
Sa ilalim ng House Bill 9929 na tatawagin ding “Sharmaine Bill”, gagawing simple at accessible ang administrative process para sa trans at intersex kung saan maaari nang ihanay ang legal documents sa pagkataong nais nila, kabilang ang pangalan at gender marker nang hindi na kailangan ng magastos at mahabang court proceedings.
Paliwanag ni Cendana, nagdudulot ng diskriminasyon ang pangalan ng trans at intersex individuals dahil madalas silang kinukutya o pinagtatawanan bunsod ng pangalan na nasa legal documents.
Kung nauunawaan aniya ang nag-trending sa social media patungkol sa pangalang “Sharmaine”, kayang-kayang unawain ang trans at intersex lalo’t karapat-dapat silang kilalanin ng batas sa pangalang nakasanayan at kung sino sila.
Sa umiiral na Clerical Error Law, maaaring magpalit ng pangalan ang isang tao kung nakasanayan na itong gamitin ng petitioner at mas kilala sila sa publiko.
Mababatid na nag-viral sa Tiktok ang sitwasyon ng prutas na orange kung saan nagrereklamo umano ito kung bakit “orange” ang kanyang pangalan gayong pwede namang “Sharmaine”.
Samantala, saklaw din ng panukala ang survivors ng gender-based violence at child abuse na nais magpalit ng pangalan para sa kaligtasan at kapakanan.
