Ikinokonsidera ng House prosecution panel ang pagkuha ng regional language translators para sa impeachment trial ni Vice President Sara Duterte.
Ayon kay House prosecution impeachment adviser at spokesperson Robert Ace Barbers, kabilang sa plano ang Bisaya, Hiligaynon, Bicolano at iba pa upang maipaliwanag nang maayos at accurate sa publiko ang impeachment trial ni Duterte.
Layon aniya ng inisyatiba na mas madaling maunawaan ang proceedings lalo na sa mga Pilipinong mas komportableng makatanggap ng kaalaman sa sarili nilang lengguwahe at upang hindi sila mabiktima ng maling impormasyon.
Paliwanag nito, malawak ang usapin ng impeachment at higit pa sa legal dahil mayroong procedural at public information kaya kailangan ng team na may iisang mensahe.
Inihayag din ng dating kongresista na ang kanyang papel ay palakasin ang public communication at tiyakin ang accurate at napapanahong impormasyon.
Dagdag ni Barbers, ang impeachment process ay isang accountability mechanism sa ilalim ng Konstitusyon na mai-a-apply kahit sa pinakamakapangyarihan sa gobyerno.
Samantala, hinimok naman niya ang mamamayan na panoorin ang paglilitis sa halip na bumabad sa social media para sa mga komentaryo.
