Isinampa na sa Land Transportation Franchising and Regulatory Board (LTFRB) ang reklamo laban sa isang driver ng Green GSM na inakusahan ng sexual harassment sa loob ng kanyang minamanehong taxi.
Sa panayam ng Brigada NewsFM Manila kay Lawyers for Commuter Safety and Protection (LCSP) Founder Atty. Ariel Inton — sinabi nitong saklaw na ng hurisdiksiyon ng LTFRB ang kaso, na bukod pa sa posibleng criminal case na maaaring isampa sa korte.
Nilinaw naman ng kampo ng complainant na ang hinihiling sa LTFRB ay ang suspensyon at posibleng pag-revoke ng lisensya ng driver, at hindi ang pagpapatigil ng operasyon ng Green GSM bilang kumpanya.
Gayunpaman, may kapangyarihan ang LTFRB na magsagawa ng motu proprio investigation, lalo na’t napag-alamang provisional authority pa lamang ang operasyon ng ilang sasakyan ng kumpanya.
Ayon pa sa abogado, hindi isolated case ang insidenteng ito.
Bukod dito, mayroon pang ibang drayber ng Green GSM na nasasangkot sa kahalintulad na reklamo, at hinihintay na lamang ang kanilang mga affidavit bago pormal na maisampa ang karagdagang mga kaso.
Patuloy naman ang koordinasyon ng LTFRB at Department of Justice (DOJ) upang mas mapabilis ang pag-iimbestiga at pagsasampa ng kaukulang kaso laban sa mga sangkot.
