Inihahanda na ng Ateneo de Manila University ang repatriation sa Nigeria ng labi ng yumaong student-athlete na si Divine Adili.
Sa Facebook post ng unibersidad nitong Sabado, sinabi nitong isinasapinal na ang mga kinakailangang dokumento at travel arrangements para sa pagbabalik ng labi ng basketball player sa kanyang sariling bansa, alinsunod sa kahilingan ng kanyang naulilang pamilya.
Ayon pa sa ADMU, magpapadala din sila ng dalawang kinatawan upang asikasuhin ang mga requirements para sa repatriation tulad ng mga bakuna at medikasyon sa pagpasok sa Nigeria.
Tiniyak naman ng unibersidad na isinasagawa ang buong proseso nang may dignidad, pangangalaga, at respeto.
Samantala, nauna nang naiuwi ang mga labi ni Rene Baterbonia sa kaniyang hometown sa Talacogon, Agusan del Sur kung saan ito mananatili hanggang sa kanyang libing sa Hunyo 24.
Sina Adili at Baterbonia ay kapwa nasawi sa isang team-building activity ng Ateneo Blue Eagles sa Dipaculao, Aurora noong Hunyo 8.
