Nilinaw ng Philippine Army Reserve Command na ang lalaking nakitang pumasok sa guho ng isang fast-food establishment matapos ang malakas na lindol sa General Santos City noong June 8 ay hindi magnanakaw kundi isang reservist na tumulong sa rescue operations.
Nag-viral sa social media ang video ng lalaki habang nasa loob ng gumuhong establisimento, dahilan upang mapagkamalan siya ng ilang netizens na nagsasamantala sa sitwasyon.
Kinilala siyang na si Ramon Capulong, 59-anyos, residente ng Lanton, Barangay Apopong sa General Santos City.
Ayon sa Reserve Command, isa siyang construction worker at Army Reservist na sinanay para tumugon sa mga emergency at kalamidad.
Sa halip na magnakaw, pumasok umano si Capulong sa mapanganib na lugar upang tumulong sa pagsagip sa mga na-trap sa loob ng gumuhong gusali kasunod ng lindol.
Dahil sa kanyang ginawang pagtulong sa kabila ng panganib, umani ng papuri si Capulong matapos lumabas ang tunay na dahilan ng kanyang pagpasok sa lugar.
Ayon sa Reserve Command, ipinakita ng reservist ang kahalagahan ng kahandaan at boluntaryong paglilingkod sa panahon ng sakuna, lalo na kapag buhay na ng tao ang nakataya.
