Hinamon ni Bicol Saro Partylist Representative Terry Ridon si Batangas Representative Leandro Legarda na ilabas na lang niya ang buong project listing ng Department of Public Works and Highways na may proponents sa 2025 budget.
Ito’y matapos umanong banggitin ni Leviste si Ridon na nagsingit ng 150 million pesos na halaga ng proyekto sa Pamplina at Pasacao sa Camarines Sur.
Ayon kay Ridon, kababalik niya lamang ngayong 20th Congress kaya paano mangyayari ang sinasabing insertions sa 2025 budget.
Hindi pa aniya siya kongresista nang buuin ang budget noong 2024 sa ilalim ng 19th Congress.
Paliwanag nito, kaysa lituhin ang publiko ay mas makabubuting huwag patingi-tingi ang inilalabas na impormasyon ni Leviste patungkol sa project listing.
Hindi na umano kailangang mag-abiso sa Kongreso o kay DPWH Secretary Vince Dizon at higit na mahalaga na ipaliwanag kung bakit hindi agad nailabas ang detalye mula nang makuha ang dokumento sa opisina ni dating DPWH Undersecretary Maria Catalina Cabral noong September 4 o higit tatlong buwan na ang nakalilipas.
Bukod dito, mahalaga umanong linawin kung bakit ngayon lang binabanggit ang listahan ngayong patay na ang nag-iisang maaaring makapagpatunay ng authenticity ng dokumento.
