Inaasahan ang pagdagsa ng tao ngayong puspusan na ang mga aktibidad tungo sa kapistahan ng Poong Hesus Nazareno.
Kaya naman ang Philippine Red Cross, naglabas ng safety tips upang mapanatiling ligtas ang bawat deboto kung sakaling maipit sa gitna ng dami ng tao.
Sa oras na dumating sa venue, huwag magmadaling mauna sa pagpasok kapag binuksan ang mga gate. Kung sakali mang nakapasok na, tandaan naman ang kinaroroonan ng lahat ng exit.
Dapat na alam rin ng bawat deboto ang lokasyon ng mga security at first aid stations. Dapat ring sumabay sa bilis ng galaw ng karamihan. At kung madapa sa gitna ng gumagalaw na tao, bumangon agad o humingi ng tulong.
Kapag naman naipit sa siksikan, panatilihing gumagalaw ang mga paa at huwag hayaang mawalan ng balanse.
At kung sakaling masugatan, agad na magtungo sa medical station.
Ang Traslacion ay isa sa pinakamalaking relihiyosong kaganapan sa bansa, kaya’t mahalagang sundin ang mga paalalang ito upang mapanatili ang kaayusan at kaligtasan ng lahat.
