Unti-unti nang nagbabalik sa normal ang operasyon ng San Jose National High School sa Tacloban City.
Maaalalang pansamantalang itinigil ang klase matapos ang naganap na insidente sa loob ng paaralan, kung saan tatlong estudyante ang nasawi at ikinasugat ng ilan.
Ayon sa Department of Education (DepEd), bagama't nagbalik na sa face-to-face classes hindi pa rin nila isinasantabi ang kapakanan at kaligtasan ng lahat ng estudyante.
Dahil dito, mas pinalawak ng DepEd ang flexible learning options para sa mga estudyanteng hindi pa handang bumalik sa regular na klase dahil sa naranasang trauma.
Pinalakas din ang seguridad sa paaralan sa pamamagitan ng paglalagay ng karagdagang CCTV cameras, walk-through metal detectors, mas mataas na perimeter fence, at mas mahigpit na police visibility.
Hindi na rin gagamiting silid-aralan ang classroom kung saan naganap ang pamamaril at ginawa na itong opisina.
Tuloy-tuloy naman ang psychosocial support, counseling, at iba pang mental health services upang matulungan ang mga estudyante at guro sa kanilang pagbangon.
Hinimok ng ahensya ang publiko na suportahan ang paghilom ng komunidad sa pamamagitan ng pagpapakita ng malasakit at pag-iwas sa pagpapakalat ng maling impormasyon.
