Naglabas ang Land Transportation Office (LTO) ng Show Cause Order (SCO) laban sa rehistradong may-ari at driver ng isang pribadong sasakyan na namataang gumagamit ng improvised license plate na may nakasulat na "FREEMASON."
Inatasan silang humarap sa pagdinig at magpaliwanag sa posibleng paglabag sa paggamit ng hindi awtorisadong plaka.
Pinasusuko rin ang driver's license ng nagmamaneho ng sasakyan, na isinailalim sa 90-araw na preventive suspension, habang inilagay naman sa alarm ang naturang sasakyan.
Binigyang-diin ng LTO na ang opisyal na plaka lamang ang maaaring gamitin dahil ito ang legal na pagkakakilanlan ng bawat sasakyan, at mahigpit nilang ipatutupad ang batas laban sa mga gumagamit ng improvised o hindi awtorisadong plaka.
