Pumalag si Sen. Chiz Escudero hinggil sa mga alegasyong nakatanggap umano siya ng maleta na may lamang pera kapalit ng kanyang pagdalo sa sesyon ng Senado noong June 3.
Sa bagong episode ng Chiz Wiz Podcast nitong Linggo, June 7, diretsahang itinanggi ni Escudero ang nasabing mga paratang laban sa kaniya.
Umugong ang nasabing alegasyon matapos siyang pumasok sa Senado noong June 3, na nagbigay-daan upang makabuo ng quorum ang kapulungan sa araw na iyon.
Ayon kay Escudero, ginawa niya ang nasabing hakbang para sa kapakanan ng institusyon at hindi dahil sa anumang pansariling interes o sa kinakaharap niyang isyu kaugnay ng flood control projects.
Iginiit din niya na walang kinalaman ang Malacañang sa kanyang naging desisyon na dumalo sa sesyon.
Samantala, nang tanungin naman sa kung kaninong panig siya sa gitna ng nagpapatuloy na isyu ng liderato sa Senado, sinabi ni Escudero na ang kaniyang panig ay sa Senado mismo dahil wala umanong kasalukuyang Senate President ang institusyon dahil si Sen. Sherwin Gatchalian ay nagsisilbi lamang bilang acting Senate President at Senate President Pro Tempore.
