Tuluyan nang sinampahan ni Senador Erwin Tulfo ng kasong libel ang ilang miyembro ng 18 maleta boys sa Pasay City Regional Trial Court kasunod ng ginawang pagdawit sa kanyang pangalan sa flood control controversy.
Sa naging flood control hearing ng Cayetano bloc, sinabi ng isa sa mga miyembro ng 18 maleta boys na si Bernard Gumban na dalawang beses daw siyang nakapag-deliver ng maleta kay Sen. Erwin.
Kung saan ang unang delivery niya raw ay dalawang maleta habang ang pangalawa ay anim na maleta.
Sa kabilang banda, sa naging press conference ng kampo ni Atty. Levi Baligod, binawi ng mga ito ang naging alegasyon ng 18 maleta boys laban kay Senadora Loren Legarda.
Ani Baligod, sa naging pagrerebyu nila nitong Marso lumabas na walang sapat na ebidensya para sabihin na nakatanggap ng maleta si Legarda.
Maari naman din daw sampahan ng senadora ng kaso ang miyembro ng 18 maleta boys na nagdawit sa kanya kung nanaisin nito.
