Nanindigan si Senador Raffy Tulfo na walang katotohanan ang nabanggit ni Senador Alan Cayetano na nahahati sa dalawa ang Senado ngayon, ang 'Senate of the Philippines' at 'Senate of the Malacañang'.
Ani Tulfo, ang ginawa nila noong June 3 na paghalal kay Senador Win Gatchalian bilang bagong SP Pro Tempore ay tinatawag na 'jurisprudence' at mayroon ding sumusuporta rito na precedent katulad ng Avelino versus Cuenco case.
Maliban pa rito, iginiit niya na marami ring dean at professor sa mga law university ang sumasang-ayon na legal ang ginawa nila.
Dagdag pa niya, hindi lang ang mga ito ang kumikilala sa kanilang naging hakbang dahil maging ang Kamara ay si Gatchalian ang kinikilalang SP Pro Tempore o acting SP.
Kaugnay nito, matapos niyang mapatanong kung kaninong panig si Cayetano kabilang ay napasabi na lang siya na parte ito ng 'Senate of the DDS'.
Sa kabilang banda, sila naman daw ang tunay na Senado ng Republika ng Pilipinas.
Samantala, iginiit naman din ni Tulfo na hindi sila kailanman magpapadikta sa Malacañang.
Patutsada niya, baka ang kampo pa raw ni Cayetano ang nagpapadikta sa DDS kung kaya't takot na takot umano ang mga ito sa kanilang mga kilos.
Sa ngayon, wala pang tugon si Cayetano hinggil sa patutsadang ito sa kanya.
