Inaresto ng pulisya ang apat na lalaki matapos umano’y mabiktima ng “budol-budol” ang isang 62-anyos na babae at matangayan ng mga alahas na nagkakahalaga ng P405,000 sa Quezon City.
Kinilala ang mga suspek na sina alyas “Virgel,” “Rodel,” “Ceferino,” at “Demetrio.”
Ayon sa imbestigasyon, nagpanggap si “Virgel” bilang raffle promoter at pinaniwala ang biktima na nanalo ito ng premyo kapalit ng pagbili ng LPG safety device.
Nakapasok umano ang suspek sa bahay ng biktima upang inspeksyunin ang LPG mechanism at doon pinasunod ang babae na ilagay ang kaniyang mga alahas sa isang lalagyan ng body powder.
Habang nalilihis ang atensyon ng biktima dahil sa pekeng medical emergency na isinagawa ng kasabwat na si “Rodel,” tinangay ng mga suspek ang mga alahas at tumakas.
Sa tulong ng CCTV backtracking, natukoy ng pulisya ang sinakyang sasakyan ng mga suspek na naging dahilan ng sunod-sunod nilang pagkakaaresto sa Quezon City at Caloocan City.
Mahaharap ang mga suspek sa kasong estafa habang patuloy namang nagbabala ang pulisya laban sa mga “budol-budol” at iba pang uri ng panloloko.
