Kinumpirma ng content creators na sina Ser Geybin at Mam Elma ang kanilang paghihiwalay matapos ang pitong taong relasyon.
Sa magkahiwalay na pahayag na inilabas sa social media kahapon, sinabi ng dalawa na hindi naging madali ang kanilang naging desisyon.
Nilinaw rin nila na walang third party na sangkot sa kanilang paghihiwalay, taliwas sa mga kumalat na espekulasyon sa social media.
Ayon kay Mam Elma, matagal nang may mga pagsubok na kinakaharap ang kanilang relasyon kahit madalas silang nakikitang masaya sa kanilang mga online content.
Aniya, sinubukan nilang ayusin ang kanilang pagsasama ngunit dumating sa puntong hindi na nila naramdaman ang dating mutual na pagmamahal sa isa’t isa.
Binigyang-linaw din ni Mam Elma ang mga kumalat na larawan ni Gavin Capinpin o Ser Geybin kasama ang isang babae na naging sanhi ng mga alegasyon ng panloloko.
Ayon sa kanya, kaibigan lamang ni Gavin ang naturang babae at wala itong kinalaman sa kanilang paghihiwalay.
Dagdag pa niya, alam niya ang tungkol sa mga pagkakataong magkasama ang dalawa dahil ipinaaalam umano ito sa kanya ni Gavin.
Sa kabila ng kanilang paghihiwalay, humiling ang dating magkasintahan ng pag-unawa at respeto mula sa publiko habang pinagdaraanan nila ang panibagong yugto ng kanilang buhay.
