NAGA CITY- Butas, natatanggal na arm chair, at iba pang sira. Ito ang tinitiis na lagay ng ilang mga upuan sa Julian B. Meliton Elementary School sa Concepcion Pequeña Naga City. Ayon sa pamunuan ng paaralan, wala pa rin ang nirequest nilang nasa 700 bagong silya.
Sa panayam ng Brigada News FM Naga kay Principal Apollo Sebello, binanggit nito na naireport nila sa National School Building Inventory ang nasabing bilang noon pang nagdaang taon pero hanggang ngayon ay wala pa rin, kung kaya ginagawan na lamang ng paaraan upang magamit pero ang mga hindi na ligtas gamitin ay inaalis na.
Noong nagdaang linggo, nagkaroon ng Management Conference at nabanggit muli ni Sebello ang kanilang sitwasyon. Welcome naman aniya sa paaralan kung magdadala ng sariling upuan ang estudyante. Malaki ang budget na kinakailangan kaya hindi aniya ito kakayanin kung kukunin sa Maintenance and Other Operating Expenses.
Panawagan ng Punong Guro ay mabigyan na ng atensyon ang pasilidad para sa komportableng pag-aaral.
