Iginiit ni Pangulong Ferdinand Marcos Jr. na hindi dapat maging arena of conflict ang South China Sea kundi manatiling dagat ng kapayapaan, kooperasyon at pagkakaugnay ng mga bansa.
Sa paggunita sa ika-10 taong anibersaryo ng 2016 Arbitral Award, sinabi ng Pangulo na nananatiling matatag ang paninindigan ng Pilipinas sa mapayapang paglutas ng mga alitan sa pamamagitan ng international law at ng United Nations Convention on the Law of the Sea o UNCLOS.
Ayon pa sa Pangulo, pinili ng Pilipinas na pairalin ang batas kaysa intimidasyon at ang dayalogo kaysa komprontasyon nang ihain nito ang arbitration case noong 2013 na humantong sa makasaysayang desisyon noong 2016.
Binigyang-diin din ni Pangulong Marcos na ang arbitral ruling ay hindi lamang usapin ng soberanya o teritoryo kundi ng kabuhayan ng mga mangingisda, pangangalaga sa karagatan at kinabukasan ng mga susunod na henerasyon.
Sinabi rin ng Punong Ehekutibo na ang 2016 Arbitral Award ay nagsilbing mahalagang batayan sa pagpapatupad ng international law sa karagatan at nagpapatibay sa prinsipyo na ang lahat ng bansa, maliit man o malaki, ay dapat sumunod sa mga kasunduang kanilang pinasok.
Nanawagan din si Pangulong Marcos sa mga bansa na patuloy na igalang ang international law at makiisa sa pagsusulong ng isang rules-based international order upang mapanatili ang kapayapaan at katatagan sa rehiyon.
#
