Inaprubahan ng Philippine Space Council ang ilang programa na layong palakasin ang kakayahan ng bansa sa paggamit ng satellite technology.
Sa ika-syam na pagpupulong ng konseho na pinangunahan ni Pangulong Ferdinand Marcos Jr. sa Malacañang, inaprubahan ang Multispectral Unit for Land Assessment o MULA Constellation Program na magpapalawak sa kakayahan ng Pilipinas sa pagkuha ng Earth observation data gamit ang mga locally developed satellite.
Ayon sa Philippine Space Agency o PhilSA, nakatakdang ilunsad ang MULA satellite sa 2027 at inaasahang makatutulong sa disaster management, agricultural monitoring at environmental mapping.
Inaprubahan din ng konseho ang pagbuo ng Philippine Sovereign Geostationary Telecommunications Satellite Program na naglalayong magbigay ng mas maaasahan at mas ligtas na communications services sa ilalim ng kontrol ng Pilipinas.
Inaasahang makatutulong ang naturang programa sa pagpapalawak ng internet at communication services sa mga malalayong lugar, pati na sa pagtugon sa mga sakuna at iba pang mahahalagang operasyon ng pamahalaan.
Pinagtibay rin ng konseho ang isang national protocol para sa pagtugon sa mga insidente na may kinalaman sa space debris o mga bahagi ng rocket at spacecraft na bumabagsak sa loob ng teritoryo at karagatan ng bansa.
Ayon sa PhilSA, nakapagtala sila ng 90 space vehicle drop zones sa himpapawid at karagatan ng Pilipinas mula 2022 hanggang 2026.
Tinalakay rin sa pulong ang planong pagsasagawa ng sounding rocket test launch sa Lal-lo, Cagayan sa pagitan ng December 2026 at February 2027 bilang bahagi ng programa ng bansa sa pagpapaunlad ng sariling kakayahan sa space technology.
