Kinondena ng Commission on Higher Education (CHED) ang sunod-sunod na bomb threats na tumama sa ilang unibersidad at kolehiyo, na nagresulta sa pagkansela ng mga klase at pagkaantala ng campus operations.
Ayon sa CHED, ang pagpapakalat ng maling impormasyon o sadyang paggawa ng mga pahayag tungkol sa presensya ng bomba, incendiary devices, o anumang mapaminsalang kagamitan ay isang seryosong paglabag na hindi maaaring palampasin sa ilalim ng batas.
Binigyang-diin ng komisyon na dapat manatiling ligtas at mapayapang espasyo para sa pag-aaral ang lahat ng institusyon ng mas mataas na edukasyon.
Ipinapaalala nito na ang anumang pagtatangka na maghasik ng takot, manggulo, o magpahina sa mga paaralan ay isang pag-atake sa academic freedom at sa tungkulin ng mga institusyong pang-edukasyon sa pag-unlad ng bansa.
Muling hinikayat ng CHED ang mga estudyante, guro, at school officials na manatiling mapagmatyag at agad i-report sa mga awtoridad ang anumang kahina-hinalang aktibidad.
