Nananawagan ng agarang aksyon ang pamunuan ng Tukuran SPED Center sa San Carlos, Tukuran, Zamboanga del Sur matapos ang sunod-sunod na insidente ng pagnanakaw at paninira sa loob ng kanilang paaralan.
Ayon sa punong-guro ng paaralan, paulit-ulit nang pinapasok ang mga silid-aralan at tinatangay ang mga gamit na maaaring maibenta upang pagkakitaan.
Sa kabila ng mga hakbang tulad ng pakikipag-ugnayan sa pulisya, paglalagay ng CCTV cameras, at pagsasampa ng mga ulat, nananatili pa rin ang problema.
Lumalabas sa imbestigasyon na ilan sa mga sangkot ay pawang mga menor de edad na napapabayaan umano at hindi na pumapasok sa paaralan.
Gayunpaman, dahil menor ang mga nahuhuli, agad din silang napapalaya matapos maaresto.
Dahil dito, nanawagan ang paaralan sa lokal na pamahalaan, pulisya, at mga opisyal ng barangay at munisipyo na magtulungan upang mabigyan ng pangmatagalang solusyon ang problema at maprotektahan ang mga mag-aaral, guro, at pasilidad ng paaralan.
Umaasa ang pamunuan ng Tukuran SPED Center na mabibigyan ng sapat na atensyon ang kanilang sitwasyon upang matigil na ang mga insidenteng nakaaapekto sa edukasyon at kaligtasan ng kanilang komunidad.
