Lalo pang lumakas ang taglay na hangin ng Super Typhoon na may international name na 'Bavi'.
Kaninang alas-otso ng umaga, na-monitor ng PAGASA ang bagyo sa layong 2, 920 kilometro, silangan ng Eastern Visayas.
Taglay na nito ang lakas ng hangin na aabot ng 205 kilometro kada oras; at bugsong papalo ng hanggang 250 kilometro kada oras.
Tinatahak nito ang direksyong pa-kanlurang timogkanluran sa bilis na 15 kilometro kada oras.
Araw ng Miyerkules, inaasahan itong papasok sa loob ng Philippine area of Responsibility at bibigyan ng local name na #IndayPH.
Sa panayam ng Brigada NewsFM Manila kay DOST-PAGASA Weather Specialist Dan Villamil, sinabi nitong bagama't mababa pa ang posibilidad na mag-landfall sa Pilipinas ang bagyo, inaasahan naman itong magpapalakas sa southwest monsoon o habagat, na posibleng magdulot ng malawakang pag-ulan sa Metro Manila at malaking bahagi ng kanlurang Luzon at Visayas.
Posible ring itaas ang Tropical Cyclone Wind Signal No. 1 sa ilang bahagi ng hilaga at silangang Luzon sa oras na makapasok ito sa PAR.
Maaari rin umanong umabot sa Signal No. 2 o No. 3 sa ilang lugar sa Cagayan Valley, habang hindi rin inaalis ang posibilidad ng Signal No. 4 sa Batanes depende sa magiging galaw at lakas ng bagyo.
