Inihain ni House Senior Deputy Minority Leader Leila de Lima ang isang panukalang batas na layong maglaan ng karagdagang 15 billion pesos na budget na tutugon sa pangangailangan ng mga apektado ng lindol sa Mindanao.
Batay sa House Bill 9860, nais ni de Lima na magkaroon ng supplemental funding para sa fiscal year 2026 upang taasan ang National Disaster Risk Reduction and Management Fund na gagamitin sa relief, recovery, repair at reconstruction efforts sa mga lugar na tinamaan ng magnitude 7.8 na lindol.
Ipinaliwanag nito na hindi na maaaring hintayin ang susunod na budget process lalo't sa lawak ng pinsalang idinulot ng lindol ay kailangan ng agarang aksyon at sapat na pondo para masimulan ang pagbangon at pagbalik sa normal na pamumuhay ng mga biktima.
Punto ng kongresista, kapag naantala ang pondo ay maaantala rin ang pagbangon ng ekonomiya pati na ang edukasyon ng mga mag-aaral.
Nakapaloob sa panukala ni de Lima ang cross-sectoral approach kung saan kabilang sa simultaneous interventions ang humanitarian, health, education, livelihood, shelter at infrastructure.
Kapag naisabatas, kasama sa mapopondohan ang Department of Agriculture na tatanggap ng 2 billion pesos, Department of Education na may 2 billion pesos, 1.5 billion pesos para sa DSWD at 500 million pesos para sa Department of Energy.
Dalawang bilyong piso rin ang ilalaan sa mga naapektuhang local government units para sa repair, reconstruction, rehabilitation, recovery services at mga programa.
