Naaresto sa Ninoy Aquino International Airport (NAIA) Terminal 1 sa Pasay City noong Mayo 31 ang isang 28-anyos na Pilipino na itinuturing na suspek sa human trafficking na may kaugnayan sa pagpapadala ng mga Pilipino sa scam hub sa Cambodia.
Ayon sa Philippine National Police (PNP), ang suspek ay kabilang sa mga most wanted person sa Cordillera region at inaresto matapos dumating mula Cambodia.
Nabatid na may kaukulang warrant of arrest na inisyu ng korte sa La Trinidad, Benguet noong Abril kaugnay ng reklamong illegal recruitment.
Isinagawa ang operasyon ng Criminal Investigation and Detection Group (CIDG) katuwang ang Aviation Security Group, anti-organized crime units, Department of Migrant Workers (DMW), at Bureau of Immigration (BI).
Batay sa imbestigasyon, nag-alok ang suspek at mga kasabwat nito ng trabaho bilang casino dealer sa abroad kapalit ng mataas na sahod.
Subalit sa halip na legal na trabaho, dinala ang biktima sa Cambodia at pinilit magtrabaho sa isang scam hub sa Phnom Penh, kung saan kinumpiska ang pasaporte at pinaghigpitan ang komunikasyon.
Nakaligtas naman ang biktima matapos makatakas at humingi ng tulong sa Philippine Embassy, na naging daan sa kanyang repatriation at sa pagsasampa ng kaso laban sa suspek.
