Gipusil patay ang tag-iya sa truck samtang nagtindog sa Secondary National Highway, Barangay Dolis, Calatrava, Negros Occidental, alas-4:20 sa hapon, Setyembre 11, 2024.
Giila ang maong biktima nga si Alyas Danelson 59-anyos ug residente sa Sitio Proper, Barangay Dolis, Calatrava.
Base sa imbestigasyon sa Calatrava PNP, nagtindog ang biktima sa kilid sa iyang truck samtang nag-supervise sa pagkarga og kahoy dihang kalit lang kini nga gipusil sa wala mailhi nga suspek gamit ang wala pa masuta nga klase sa armas de fuego.
Gihingagaw pa kini og dala pa sa hospital apan gideklarar nga dead on arrival.
Narekober sa mga otoridad gikan sa crime scene ang unom ka fired cartridges sa caliber .45 tsinelas nga matod pa gipanag-iyahan sa suspek og tsinelas usab sa maong biktima.
Sa karon, padayon ang hot pursuit operation sa kapulisan sa suspect sa maong krimen ingon man sa pagsusi sa unsa man nga motibo sa pagpatay kang alyas Danelson.
