Arestado na ang tatlong suspek sa umano'y pagdukot at pagpatay sa dating Abuyog, Leyte Vice Mayor James Bohol at anak nito.
Kinilala ng pulisya ang mga suspek na sina Kim Taboy Solayao, Reniel Galza at Mark James Generales Taboy, na pawang mga residente ng Basey, Samar.
Ayon sa Philippine National Police (PNP), dakong alas-9:00 ng gabi nitong June 30 nang maaresto ang tatlo sa isinagawang operasyon ng Anti-Kidnapping Group (AKG), Criminal Investigation and Detection Group (CIDG) at Police Regional Office 8 (PRO-8) sa Pasay City.
Sa pulong-balitaan sa Camp Crame, sinabi ni AKG Director BGen. Edwin Balles na kusang umanong umamin ang tatlong suspek sa kanilang pagkakasangkot sa krimen.
Batay sa kanilang paunang pag-amin, pinagplanuhan umano nila ang pagdukot at pagpatay sa dating vice mayor at sa anak nito.
Paulit-ulit umano nilang pinalo ng matigas na bagay, na pinaniniwalaang dumbbell, ang mga biktima bago pa ito pinagsasaksak.
Isa sa mga tinitingnang motibo ng mga imbestigador ang umano'y pagkakautang ng isa sa mga suspek kaugnay ng negosyo sa cooking oil.
Gayunman, patuloy pang inaalam ng mga awtoridad ang eksaktong motibo ng krimen at kung bakit nadamay ang anak ng dating vice mayor.
Ayon pa sa PNP, nagpadala umano ng surrender feeler ang tatlong suspek bago tuluyang sumuko at maaresto sa Pasay City.
Matatandaang unang naiulat na nawawala ang mag-amang Bohol sa Mayorga, Leyte.
Makalipas ang ilang araw, natagpuan ang kanilang mga bangkay sa isang bangin sa Barangay Imelda, Silago, Southern Leyte.
Kasalukuyang nasa kustodiya ng AKG ang tatlong suspek habang isinasailalim sa inisyal na proseso bago ilipat sa kustodiya ng PRO-8 para sa karagdagang imbestigasyon.
Mahaharap ang mga suspek sa 2 counts ng kasong murder.
