Mas mataas na ang babayarang terminal fee ng mga biyaherong dadaan sa Batangas Port simula July 1, dahil ipapatupad na ang 2nd tranche ng terminal fee increase na inaprubahan ng Philippine Ports Authority (PPA).
Mula sa kasalukuyang P60, magiging P90 na ang terminal fee dahil sa karagdagang singil na P30.
Ayon kay Dominador Bustamante, tagapagsalita at Assistant Vice President for Strategic Communication and Public Affairs ng Asian Terminals, ang operator ng Batangas Port, bagama't naririnig nila ang sentimiyento ng mga pasahero kaugnay ng dagdag-singil ay walang sapat na dahilan upang ipagpaliban ang implementasyon ng terminal fee increase dahil inaprubahan na ito ng PPA noong nakaraang taon.
Matatandaang 60 pesos ang inaprubahang terminal fee increase pero hinati ang implementasyon nito kung saan ang first tranche na P30 ay ipinatupad noong January 1, 2026 kaya naging 60 pesos ang terminal fee.
Samantala, mananatiling libre sa terminal fee ang mga senior citizen, persons with disabilities (PWDs), mga estudyante, uniformed personnel at Medal of Valor awardees.
Tiniyak naman ni Bustamante na kasabay ng pagtaas ng terminal fee ay ang patuloy na pagpapabuti ng mga pasilidad at serbisyong ipinagkakaloob nila sa mga pasahero bilang bahagi ng modernisasyon ng Batangas Port.
