Pinayuhan ni Bukidnon Representative Jonathan Keith Flores ang sinasabing kongresista na nahuling nanonood ng online sabong sa kasagsagan ng sesyon noong Lunes ng umaga na umamin at humingi na ng paumanhin sa publiko.
Sa panayam kay Flores ngayong araw, iginiit nitong ang pinakamagandang gawin ng nag-viral na umano'y kongresista ay mag-public apology at mangakong hindi na ito uulitin.
Sa pamamagitan aniya nito ay huhupa ang epektong naidulot ng larawan lalo na sa imahe ng Kamara.
Naniniwala si Flores na dapat lumantad na ang nanood ng online sabong dahil bagama't isolated ang kaso ay mababahiran naman ang reputasyon ng mga kongresista at ng buong institusyon.
Hindi umano magandang tingnan na nasa loob ng plenaryo ngunit gumagawa ng hindi tamang bagay.
Dagdag pa ng mambabatas, nauunawaan niya na may mga pagkakataong nakakainip ang sesyon at may ibang ginagawa ang House members.
Pero ipinunto ni Flores na ibang usapan ang panonood ng online sabong.
Gayunman, dapat umanong beripikahin muna kung talagang miyembro ng Kamara ang sangkot.
