Patay ang isang hinihinalang miyembro ng New People's Army (NPA) matapos ang engkuwentro sa pagitan ng pinagsanib na tropa ng militar at armadong grupo sa Magsaysay, Occidental Mindoro.
Ayon sa 203rd Infantry Brigade, matapos ang bakbakan, narekober ng mga tropa ang isang high-powered firearm, iba pang war materiel at mga personal na gamit na iniwan umano ng mga tumakas na rebelde.
Patuloy naman ang pursuit operations laban sa iba pang miyembro ng grupo, kabilang ang isang kumpirmadong sugatan sa engkuwentro.
Bago ang naturang insidente, nakarekober din ang militar ng isang arms cache sa Bulalacao, Oriental Mindoro na naglalaman ng isang M16 rifle, isang improvised shotgun, at dalawang improvised explosive devices o IEDs.
Ayon kay 203rd Infantry Brigade Commander Brigadier General Melencio Ragudo, malaking bahagi ng tagumpay ng operasyon ang pakikipagtulungan ng mga residente sa pagbibigay ng impormasyon sa mga awtoridad upang mapanatili ang kapayapaan at seguridad sa Mindoro.
