Binigyang-diin ng United Nations (UN) ang tungkulin ng International Criminal Court (ICC) bilang sandigan sa paghawak ng mga malalaking krimen.
Ayon kay UN spokesman Stéphane Dujarric, bagaman ang ICC ay isang organisasyon na nakahiwalay sa Secretariat at sa UN, nananatili itong "critical cog" sa international justice system.
Suportado umano ito ng malaking bilang ng mga members-states, at tumutulong din upang mapanagot ang mga dapat managot sa mga krimen.
Mababatid na kamakailan ay inilunsad ni US secretary of state
Marco Rubio ang kampanya para buwagin ang ICC.
Iginiit ni Rubio na nakikialam umano ang nasabing korte sa mga operasyon ng militar at law enforcement ng Estados Unidos.
Inaakusahan din ng US ang international court na nagdudulot ng giyera laban sa kanila, hindi gamit ang bala at missile, kung 'di gamit ang mga batas.
Una nang dumistansya si Palace Press Officer Claire Castro sa desisyong ito ng administrasyon ni US President Donald Trump.
Kasabay nito, idiniin niyang sumusunod lang ang Marcos administration sa batas.
Matatandaan na noong nakaraang taon, na-detain si dating pangulong Rodrigo Duterte sa The Hague dahil sa mga kasong kaugnay ang crimes against humanity.
