Ikinasa na ng grupong Bantay Senado ang unang Barangay Assembly nito kaugnay ang Impeachment trial laban kay Vice President Sara Duterte sa Taytay, Rizal.
Sa isang social media post, idiniin ni Bantay Senado convenor at spokesperson Cleve Arguelles na simple lang naman ang layunin ng hakbang na ito – ang matulungan ang publiko na makiisa sa isa sa pinakamahalagang democratic processes sa bansa.
Dahil dito, inilatag umano nila sa mga participants ang proseso ng paglilitis.
Pinakinggan din daw ng grupo ang pananaw ng mga nakiisa hinggil sa kahalagahan ng trial sa mga ordinaryong mga Pilipino.
Ani Arguelles, simula pa lang ito.
Asahan na raw ang marami pang barangay assemblies sa susunod na linggo kung saan posibleng kabilang ang ilang lugar sa Manila, Pasig, Marikina, Laguna, San Mateo, at Quezon City.
Sa huli, umaasa umano ang Bantay Sarado na magagawa nilang mailapit sa publiko at mga komunidad ang usapin ng impeachment trial laban kay VP Sara.
Nagpasalamat din ito sa mga volunteers na nagtutulungan upang matagumpay na maisagawa ang barangay assembly.
