Pinaiimbestigahan na ng Makabayan Bloc sa Kamara ang nangyaring insidente ng unauthorized transactions at pagkawala ng pera ng mga customers ng e-wallet na GCash.
Batay sa House Resolution 2068, iginigiit ng mga mambabatas na dapat panagutin ang GCash dahil sa posibleng iregularidad na lubhang nakaapekto sa mga Pilipinong malaki ang tiwala sa kanila para sa araw-araw na transaksyon.
Marapat anilang siyasatin ang mga insidente upang makapagpatupad ng mas malakas na regulasyon at upang maprotektahan ang customers.
Bukod dito, nadismaya ang Makabayan Bloc dahil sa kabila ng umiiral na SIM Card Registration Law ay marami pa ring ulat ng cyber fraud, scam, hacking at iba pang kahalintulad.
Mababatid na maraming GCash users ang nagreklamo hinggil sa unauthorized transactions at pagkaubos ng kanilang pera mula sa e-wallet accounts.
Ngunit depensa ng GCash, nagkaroon umano ng error sa system reconciliation process, bagama't nilinaw na ligtas ang pera ng kanilang customers.
