Umaasa ang Volunteers Against Crime and Corruption (VACC) na maisasama ni Pangulong Ferdinand Marcos Jr. sa kanyang ikalimang State of the Nation Address (SONA) ang panukalang amyendahan ang Juvenile Justice and Welfare Act of 2006.
Ayon kay VACC Chairperson Arsenio Evangelista, napapanahon nang ibaba sa 10 taong gulang ang minimum age of criminal responsibility, katulad ng ipinatutupad sa Australia at New Zealand kung saan aniya ay nakatulong sa pagpapababa ng insidente ng krimen.
Sa kasalukuyan, 15 taong gulang ang minimum age ng mga batang maaaring managot sa ilalim ng batas sa Pilipinas.
Samantala, umaasa rin ang grupo na higit pang paiigtingin ng Pangulo ang kampanya laban sa korapsyon, kabilang ang pagpapanagot sa mga sangkot sa katiwalian at ang pagpapatupad ng total ban sa online gambling sa bansa.
Sa huli, tiniyak ng VACC na ipagpapatuloy nito ang pagsusulong ng mga hakbang laban sa korapsyon at pananagutin ang sinumang mapapatunayang sangkot sa anumang uri ng katiwalian.
