Arestado ang isang 23-anyos na lalaki na itinuturong sangkot sa viral na insidente ng panghoholdap sa isang online seller sa Taguig.
Ayon sa Taguig City Police Station, nadakip ang suspek na si alyas "Joshua" madaling-araw ng July 4 sa isang intelligence operation sa Barangay South Signal.
Naaresto siya matapos umanong maaktuhang may dalang kalibre .45 na baril at isang hand grenade nang walang kaukulang permit.
Positibong kinilala rin siya ng biktima na isa sa mga suspek sa viral na armed robbery noong July 1 sa Barangay North Signal.
Ayon sa biktima, tinangay ng mga suspek ang ilang mamahaling cellphone, at P25,000 na cash.
Bukod sa kasong illegal possession of firearm at illegal possession of explosives, paghahandaan na rin ng pulisya ang kasong robbery laban sa suspek.
Patuloy naman ang operasyon ng mga awtoridad upang matunton at maaresto ang isa pang suspek na nananatiling nakatakas.
