Ipinatatawag ngayon ng Land Transportation Office (LTO) ang moto-vlogger na si "Papa Henry TV" matapos itong mag-upload ng video online, kung saan makikitang kumukuha ito ng Official Receipt/Certificate of Registration at authorization letters mula sa publiko, at namimigay ng mga plaka ng sasakyan sa pamamagitan ng koneksyon nito sa mga kawani ng ahensya.
Naniningil umano ang content creator ng bayad sa delivery at dagdag na halaga na tinukoy bilang “pang-kape.”
Ayon sa LTO, tanging ang mga authorized at accredited agents lang ang pinahihintulutan nila na mag-claim ng mga plaka.
Dagdag pa ng ahensya, maituturing na iligal ang ginagawa ng vlogger dahil hindi awtorisado ang pakikialam nito sa opisyal na proseso ng pamahalaan, na malinaw na paglabag sa Ease of Doing Business and Efficient Government Service Delivery Act of 2018.
Nakatakda namang maglabas ang LTO ng isang Public Advisory upang payuhan ang publiko na hindi awtorisado ng ahensya ang mga vloggers, influencers, o private individuals na kumuha, maglabas, o mamahagi ng mga plaka.
