Darating ang tamang oras na ipatatawag si Vice President Sara Duterte bilang testigo ng House prosecution panel sa mga alegasyon sa Articles of Impeachment.
Sa pulong balitaan, sinabi ni House Prosecution Legal Spokesperson Atty. Benjamin Tolosa Jr. na hindi lang basta presensya ni VP Sara sa impeachment trial ang mahalaga at hindi siya maaaring maging “miron” o tagapanood at umaalalay lang sa witness.
Kailangan aniyang ipaliwanag nito nang personal ang mga seryosong alegasyon at dito ay mas masisiyahan ang publiko.
Pero pinag-uusapan pa umano kung magkakaroon ng material at relevant testimony mula sa bise-presidente kaya nauunawaan nila ang pakinabang o panganib na idudulot nito sa kaso.
Punto niya, kahit magpakita si VP Sara ngayong araw ay hindi maaaring samantalahin ang pagkakataon nang ganoon na lang para paharapin siya sa witness stand lalo’t umiiral ang 5-day notice rule.
Inaasahan din ni Tolosa ang kooperasyon ni OVP Chief-of-staff Atty. Zuleika Lopez at magpapakita ng paggalang sa proceedings lalo’t siya ay abogado.
Paliwanag ng tagapagsalita, ipapa-qualify nila sa impeachment court si Lopez bilang hostile witness nang sa gayon ay papayagan ang “leading questions” na maihahalintulad sa cross-examination.
Hindi naman itinuturing ng prosekusyon na bentahe ang pagiging hostile witness dahil handa lang sila na tumalima sa rules.
