Nababahala ang mga leader sa Kamara sa ginawang paglabag ni Vice President Sara Duterte sa security protocols nang bumisita ito sa detention center kung saan nakakulong si OVP Chief-of-staff Atty. Zuleika Lopez.
Sa isang statement, binigyang-diin nina Senior Deputy Speaker Dong Gonzales, Majority Leader Mannix Dalipe at Deputy Speaker David Suarez na binuksan nila ang pinto ng malasakit para kay VP Sara at binigyan ng espesyal na pahintulot na bisitahin si Lopez kahit lampas na sa regular na oras ng pagbisita.
Ngunit hindi na anila umalis si Duterte pagkatapos ng oras ng pagbisita at sa halip ay tumuloy sa opisina ng kapatid na si Davao City Representative Paolo Duterte.
Punto ng House leaders, ilang beses nang pinakiusapan ng Sergeant-at-arms ang pangalawang pangulo ngunit binalewala niya ito, dahilan upang magpatupad ng lockdown para saa kaligtasan ng lahat at proteksyon ng institusyon.
Nagpaalala naman sila sa lahat at sa mga opisyal ng gobyerno na may mga patakaran o protocol na sinusunod sa Kamara para tiyakin ang seguridad at kaayusan.
Dagdag pa nina Gonzales, Dalipe at Suarez, ang Mababang Kapulungan ay hindi lugar para abusuhin o gawing personal na espasyo kahit sino pa ang sangkot.
Sisiguraduhin umano nila na hindi na mauulit ang insidente sa pamamagitan ng pagpapalakas sa mga patakaran na may patas na implementasyon at poprotektahan ang integridad ng institusyon.
