Naglabas ng pahayag si Vice President Sara Duterte hinggil sa pagkakaugnay umano ni dating House Speaker Martin Romualdez sa mga usapin ng katiwalian.
Ito ay kasunod ng sinabi niyang nakatatanggap ng kickback ang kongresista mula sa illegal gambling.
Sa kanyang statement ngayong araw, sinabi ni VP Sara na naniniwala siya sa istoryang sangkatutak na mga maleta ng pera na inihahatid umano sa bahay ni Romualdez.
Tumutugma raw kasi ito sa napabalitang pagtanggap ng mambabatas ng suhol.
Idiniin din ng bise presidente na laging lumalabas ang pangalan ni Romualdez sa usapin ng korapsyon, maging sa Delaware Court proceedings na kaugnay ng Okada Manila casino.
Ani Duterte, hindi ito nagkataon, kung 'di 'disturbing' o nakababahalang pattern, at itong pattern na ito ang nagbibigay-kredibilidad sa testimonya ni Orly Guteza hinggil sa maleta ng 'basura' na inihahatid sa kongresista linggo-linggo.
Mababatid na si Guteza ang sinasabi ni Senador Ping Lacson na 'surprise witness' ni Sen. Rodante Marcoleta sa pagdinig sa flood control, at siya rin ang nagdawit at nagdiin kay Romualdez sa katiwalian.
Maliban diyan, sinabi rin ni Duterte na paulit-ulit niyang kinekwestyon ang desisyon ni Pangulong Bongbong Marcos sa pagpili niya kay Romualdez bilang House Speaker.
